𝐄-𝐏𝐀𝐑𝐈𝐀𝐊𝐀 : 𝐒𝐞𝐡𝐚𝐭𝐫𝐚 𝐧𝐨𝐦𝐞𝐫𝐢𝐤𝐚 𝐯𝐚𝐨𝐯𝐚𝐨 𝐡𝐚𝐧𝐚𝐩𝐚𝐫𝐢𝐚𝐡𝐚𝐧𝐚 𝐧𝐲 𝐭𝐨𝐫𝐨𝐡𝐚𝐲 𝐚𝐫𝐚-𝐩𝐚𝐦𝐨𝐤𝐚𝐫𝐚𝐧𝐚

14 𝒔𝒆𝒑𝒕𝒂𝒎𝒃𝒓𝒂 2026, 𝑵𝒂𝒏𝒊𝒔𝒂𝒏𝒂_Mitaky fomba vaovao sy manakaiky kokoa ny tantsaha ny fampandrosoana ny fambolena amin’izao vanim-potoana nomerika izao. Ho fanamafisana ny rafitra fanapariahana sy torohay ara-pamokarana, dia natolotra tamin’ny fomba ofisialy tao amin’ny CFFAMMA-GR Nanisana ny E-PARIAKA.

Sehatra nomerika sy fitaovana stratejika natao hampifandray ireo mpisehatra rehetra sy hanamorana ny fizarana fahalalana, ny haitaom-pamokarana ary ireo fitaovana enti-mampiofana ny tantsaha ny E-PARIAKA.

Naseho nandritry ny fotoana ny vokatry ny fanadihadiana momba ny rafitra fanapariahana sy torohay ara-pambolena ao amin'ny Faritra Analamanga sy Vakinankaratra.

Tafiditra anatin'ny fanatanterahana ny fanapaha-kevitra noraisina nandritry ny "Herinandron’ny fanapariahana ara-pamokarana" tamin’ny volana febroary lasa teo ity hetsika ity, izay mifandraika amin'ny fampiharana ny Paikady Nasionaly momba ny Fanapariahana sy Torohay ara-pamokarana (SNVCA), mikendry ny hanamafy ny fahombiazan’ny fanitarana sy ny fanakaikezana ny tolotra ho an’ny tantsaha.

Ny fanofanana ireo teknisiana sy Tompon’andraikitra ao amin’ny MiASA amin’ny fitantanana sy fanavaozana ny angontoro dia hanampy amin’ny fiantohana ny faharetan’ny rafitra.

Vokatry ny fiaraha-miasan’ny MiASA, ny FCA ary ny fandaharanasa GP-SAEP, ireo hetsika roa ireo. Hanampy amin’ny fananganana rafitra fanapariahana matanjaka kokoa sy mifanaraka amin'ny filàn’ny tantsaha, ho fandraisana anjara amin’ny fanatrarana ny Fahaleovantena ara-tsakafo eto Madagasikara.